Традиционалниот меѓународен турнир „Штипски Боречки Асoви“ и оваа година ќе го претвори Штип во вистински центар на младинското ривалство, спортскиот дух и почитта кон боречката традиција.
На 29 ноември, во спортската сала „Коле Нехтенин“, ќе се соберат најталентираните млади надежи од девет држави – Србија, Бугарија, Грција, Косово, Албанија, Романија,Турција, Mакедонија – за да го покажат својот квалитет, карактер и боречки жар.
Овој турнир, кој се одржува од 2015 година, е создаден како чест и вечна благодарност кон штипските боречки легенди кои повеќе не се меѓу нас, но оставиле неизбришлив белег во историјата на македонското борење. Тие се пример за генерациите што доаѓаат, а турнирот претставува мост помеѓу славното минато и иднината што ја градат денешните талентирани деца и пионери.
Организацијата на настанот е на врвно ниво и е предводена од Боречкиот клуб „Балканец“ во соработка со Боречката федерација на Македонија. Посветеноста и трудот на организаторите овој турнир го претвораат во еден од најзначајните детско-пионерски турнири во слободен стил во регионот.
Боречкиот клуб „Балканец“, како домаќин, ќе настапи со силен состав под водство на искусните тренери Мики Тодоров и Давор Тасев, како и претседателот на клубот, Виктор Богданов.
