Посетата на културен настан во Штип сè почесто се претвора во вистински предизвик. Влезовите на клучните културни институции, како што се Народниот театар и Домот на културата „Ацо Шопов“, се узурпирани од маси, столови и инвентар поставен од околните угостителски објекти. Наместо слободен пристап до просторите на културата, граѓаните мора да се провлекуваат низ тесни премини помеѓу поставените маси, што не само што создава непријатност, туку и директно го нарушува јавниот ред и достоинството на овие институции.
Но дали сопствениците плаќаат или го изнајмуваат овој простор и Дали имаат право да узурпираат јавен простор особено пред државна институција ?
На барање на Енџелс ФМ, од Општина Штип потврдија дека сопствениците на локалите немаат дозвола, ниту правен договор со општината за користење на јавниот простор пред овие објекти. Согласно законските прописи, јавниот простор пред објекти од јавен интерес, особено културни установи, не смее да биде приватизиран или комерцијално експлоатиран без соодветна дозвола.
Дополнително, директорот на институциите Пеце Рситевски истакна дека локалите имаат обврска да ги отстранат масите и столовите за време на претстави и други настани. Сепак, во пракса оваа обврска ретко се почитува.
Останува прашањето – зошто оваа појава се толерира и до кога граѓаните ќе мора да се борат со мебел за да стигнат до култура?
