Првиот рапер добитник на Пулицерова награда, Кендрик Ламар, ќе настапи на полувремето на Суперболот во 2025 година, објавија во неделата Националната фудбалска лига и Ејпл мјузик.
Ова ќе биде вторпат повеќекратниот добитник на Греми и на Пулицер да настапува на еден од најпосакуваните музички настани, но ќе биде прв пат тој да биде главен изведувач, пишува Би-би-си.
„Рап музиката сè уште е највлијателниот жанр досега. И јас ќе бидам таму да го потсетам светот зошто. Тие ја добија вистинската личност за тоа“, рече Ламар.
Суперболот ќе се одржи на 9 февруари во Њу Орлеанс во Caesars Superdome и ќе се емитува на телевизија Фокс. Ќе биде продуциран од раперот Џеј Зи, кој ги продуцираше и последните пет изведби на Супербол.
Ламар веќе има настапувано на овој настан, но не како соло уметник, туку заедно со Д-р Дре во 2022 година. Тогаш, сцената на Супер Боул ја делеа Дре, Снуп Дог, 50 Сент, Мери Џеј Блајџ, Кендрик и Еминем.
„Кендрик постојано ја докажува својата уникатна способност да создава посебни моменти кои ги редефинираат и на крајот ги разнишуваат самите основи на хип-хопот“, рече шефот на музика во НФЛ, Сет Дудовски.
Ламар се најде на насловните страници оваа година поради неговата јавна расправија со канадскиот рапер Дрејк, а двете ѕвезди објавија серија песни „Disstracks” (напишани за намерно да навредуваат или нападнат одредена личност или група) на почетокот на оваа година. Две песни со Ламар станаа големи хитови, вклучувајќи ги „Like That Future“ и „Metro Boomin“, како и „Not Like Us“ на Ламар.
На овој спортски настан настапија уметници како Мадона, Ријана, Ашер, Бијонсе, „Ролинг стоунс“ и Брус Спрингстин.
Супербол е најголемиот спортски настан во Америка. Привлекува десетици милиони гледачи и се емитува низ целиот свет.