Штип повторно се соочува со сериозен проблем со водоснабдувањето. По повеќе од 40 часа без вода, синоќа во дел од населбите водата накратко беше пуштена, но надежта за нормализирање на состојбата траеше кратко. Од денеска повторно се најавува прекин на водоснабдувањето во наредните 24 часа, поради повторна појава на дефект на водоводната линија на која изминатите денови се вршеа санациски активности.

Поради сериозноста на ситуацијата, во погодените населби е прогласена кризна состојба, а надлежните ги повикуваат граѓаните навремено да се снабдат со потребните количества вода за пиење.

Како мерка за справување со проблемот, ќе бидат поставени цистерни со техничка и флаширана вода на неколку локации низ градот, со цел да им се обезбеди основно снабдување на жителите додека трае прекинот.

По повеќе од 40 часа без вода, граѓаните повторно се соочуваат со нов ден на неизвесност, а главното прашање останува кога водоснабдувањето конечно ќе биде нормализирано.

18/11/2026