На денешен ден, 11 август 1992 година, Собранието на Република Македонија го усвои првото државно знаме на независна Македонија, со што беше направен уште еден значаен чекор во процесот на градење на државните симболи на земјата.
Првото знаме беше црвено, со златножолто шеснаесеткрако сонце, познато како Сонцето од Кутлеш или Ѕвездата од Кутлеш. Симболот претставува стилизирано сонце со 16 зраци и е поврзан со античката македонска историја.
Спектакуларниот археолошки примерок на шеснаесеткракото сонце бил откриен во 1977 година во Кутлеш, за време на археолошките ископувања предводени од професорот Манолис Андроникос. Сонцето било пронајдено на златен ларнакс во комплексот на кралските гробници во Вергина.
Симболот се најде на македонското државно знаме во периодот од 1992 до 1995 година. По постигнувањето политички договор за промена на државниот симбол, Македонија во 1995 година го усвои денешното знаме – црвено знаме со златно-жолто сонце со осум крајни зраци.
На 11 август 1992 година Собранието ја усвои и државната химна „Денес над Македонија“, со што Македонија ги заокружи своите основни државни симболи во првите години по осамостојувањето.
Химната, чиј текст е напишан од Владо Малески, а музиката е компонирана од Тодор Скаловски, и денес е официјална химна на Република Северна Македонија.
Денешниот датум останува запишан како значаен во поновата македонска историја – денот кога пред 34 години беа усвоени првото државно знаме и химната на независна Македонија.