Во сенка на фудбалското, полека минува неофицијалното Светско тениско првенство, како го нарекуваат Вимблдон. Денеска на Гренд-слемот во Лондон ќе се играат полуфиналните дуели во машка конкуренција.
Во првиот меч (14:30 часот), ќе излезат Александар Зверев и Артур Фери, а потоа следи спектаклот. Во дуелот што го очекува целиот свет ќе играат Новак Ѓоковиќ и Јаник Синер.
Тоа е меч на седумкратниот победник во Лондон и актуелниот бранител на трофејот од минатата година. Иако сите посакуваа тие да се сретнат во дуелот за трофејот, ждрепката не го дозволи тоа. Затоа со право овој меч го носи епитетот „финале пред финалето“.
На годинешниот Вимблдон, Новак Ѓоковиќ веќе стана тенисер со најмногу победи во историјата на Лондонскиот Гренд слем (107). Тој го надмина и Роџер Федерер по бројот на одиграни натпревари (120). Во вторникот го победи Феликс Оже-Алиасим во најдолгото четвртфинале досега.
Само уште два триумфа го делат најуспешниот тенисер на сите времиња Ѓоковиќ од неговата 25-та титула од Гренд слем и осмиот трофеј на Вимблдон, бројка што ја има само легендарниот Швајцарец од 2017 година.
Тој е веќе апсолутен рекордер кај мажите по бројот на полуфинални настапи. Во својот 15-ти за противник го има Јаник Синер во моментов светски рекет број 1.
Кога во прашање се меѓусебните дуели, Италијанецот е за нијанса подобар. Во 11-те меча досега Синер победил шест пати, а Ѓоковиќ пет. Пред да се сретнат во финалето на Дејвис купот во 2023 година, Ѓоковиќ водеше со 4-1, но потоа Италијанецот оствари пет победи во низа. Последниот меч беше полуфиналето на Австралија опен кое Ѓоковиќ во епски дуел го доби со 3:2.
Почетокот на даночниот меч е закажан за 16.30 часот, но тоа секако ќе зависи и од текот на првиот полуфинален дуел.