Под покровителство на УНЕСКО, денес по 14-ти пат се одбележува Светскиот ден на радиото – медиум кој повеќе од еден век ги поврзува луѓето, ги информира, едуцира и инспирира. Овој ден има за цел да ја подигне свеста за значењето на радиото меѓу јавноста и медиумите, да го поттикне вмрежувањето и меѓународната соработка меѓу радиодифузерите, како и да го промовира пристапот до информации и слободата на изразување.
Радиото отсекогаш било глас на заедницата – достапно, непосредно и блиско до луѓето. Без разлика дали станува збор за вести, музика, спорт или едукативна програма, радиото останува медиум кој допира до срцата на слушателите.
Во тој дух, Радио Angels FM е основано на 01.07.2010 година, а официјално започна со емитување на 19 август 2010 година на фреквенција 106,4 MHz. Прв главен и одговорен уредник беше Трајче Јованов, кој со визија, ентузијазам и професионалност ги постави темелите на радиото.
Со слоганот „Квалитетен звук за луѓе со стил“, Радио Angels FM изгради препознатлив идентитет и доверба кај својата публика. Радиото ги промовира успешните луѓе, македонската музика, спортските настани и успесите на спортистите, како и вредностите на културата и образованието.
Преку својата програма, Радио Angels FM не е само медиум, туку партнер на заедницата – простор каде што се слушаат вистинските приказни, се поддржуваат вистинските вредности и се создава позитивна енергија.
