Керим Алајбеговиќ е новото име за кое зборува фудбалскиот свет. Осумнаесетгодишниот репрезентативец на Босна и Херцеговина беше еден од хероите во победата од 3:1 над Катар, со која неговата селекција обезбеди пласман во нокаут-фазата на Светското првенство 2026. Младиот офанзивец беше прогласен за играч на натпреварот, а неговата одлична партија не остана незабележана ниту кај легендарниот Златан Ибрахимовиќ.
„Сите зборуваат за голот, но за мене голот не е најважната работа. Најважна е храброста. Момче од 18 години на Светско првенство, под притисок и пред милиони гледачи, игра како да е сопственик на стадионот. Тоа е реткост“, изјави Ибрахимовиќ.
Според шведската легенда, талентот е важен, но уште поважен е карактерот.
„Кога го гледав Керим, не видов млад играч кој се надева на добар натпревар. Видов играч кој верува дека е најдобар на теренот. Завршницата беше прекрасна, техниката совршена, но најмногу ме импресионираше самодовербата пред голот. Големите играчи не чекаат шанси – тие ги создаваат“, додаде Ибрахимовиќ.
Алајбеговиќ против Катар испиша и историја. Со 18 години и 276 дена стана најмладиот фудбалер кој постигнал гол од далечина на Светските првенства, соборувајќи го рекордот на француската ѕвезда Килијан Мбапе. Крилниот напаѓач минатата сезона постигна 13 голови во 44 натпревари за Салцбург, а веќе го привлекува вниманието на бројни европски гиганти. Според медиумските шпекулации, интерес за негов ангажман покажува италијанска Аталанта, а се споменува и можен трансфер вреден околу 30 милиони евра.
Доколку продолжи со вакви настапи, Алајбеговиќ би можел да стане едно од најголемите откритија на Светското првенство и едно од најжешките имиња на европскиот трансфер пазар.
